今日返到去，見坐我隔離的同事用紙巾蓋住個口，諗多兩望，嘩！佢眼角，顴骨，咀角同手背都損左！仲滲緊血水添！我地前前後後連大佬十幾個同事走過去叫佢好快D去看醫生，但佢都唔係幾郁。原來佢過馬路時就轉燈，諗住行快D點知比電車路kick到跌低左。我勸佢加比保險經紀睇下有沒得賠，好彩佢諗兩諗後都係打左，咁都好D。問過點先有得claim先去睇醫生嘛～我地仲千叮萬囑要佢一定要打破傷風針。最後佢睇完醫生返番上黎，好在，都係有打針。 我地笑佢今次真係真PK啦！2009年最後一日都咁黑仔。講真，真係好難想像跌倒會跌得咁嚴重，傷處又腫左。仲要錶都壞埋，你睇下下面張相，時針分針係停係佢跌的那一刻，好似汶川地震咁。 
下午繼續趕圖，趕到人都癲。大佬諗住好識做咁外賣左沙律火雞，仲開埋白酒叫做慶祝除夕。其實真係幾surprise ge，如果唔係趕野的話會開心D。但係今日又趕頭趕命，又要比面大佬，變了要拿拿臨食，咁就差左囉～最後要搞到六點七先至走到。
好似我年年除夕都有回顧，今年都寫一寫： 一至二月：考完個HKIA，是絕對hea的兩個月，很開心～二月尾仲知道一次過考到咁多份written exam的合格，簡直開心都爆！其實我在打開那個pdf在找自己的名字時，個心真係砰砰亂跳。咁考得試，prepare左咁耐，當然其望自己合晒格ga lah！等放榜時都有諗過如果一次過合晒格就好了，咁就型了～但估唔到真係得左！還記得那天我係笑得最衷心的一天。 三月：備考interview。其實都幾驚，不過諗住可以半年考一次，「第一次就當試啦」的心理就只是狂讀雞精notes。還記得那天我早到了試場，見到考完但有點受到打擊的cargo，我就不禁有點怕起來。尤其是坐在考室門外的椅上，更加是心跳如雷。不過因為等左好耐，緊張的感覺都消失了才入內面試，所以都算好彩，發揮到水準。考完當晚我密切留意HKIA網頁，即刻就知道結果了！其實今次就心中有數，所以看到結果後都呼了一口氣。廿幾年的讀書考試生涯暫且可以停一停了。 六月：考CRE，在好多條做唔晒的情況下都合到格，可算係符碌。 八月上旬：心花怒放，蠢蠢欲動。八月中旬：心碎欲裂。八月下旬：迷惘惆悵。 九月：月頭跟中同去了台北旅行。其實幾好玩呀，如果時間長少少仲好，四日的確短了些，有一些想去的地方都沒去到，不過好在台灣很近，好易再去多次。放完假返黎就開始沒有阿哥，要直接同三佬交手，又多了個阿姐的日子。其實都ok ge，阿姐都係實幹型，而三佬，我對佢採取不聞不問的手法，沒影響到我的，我就唔理。但講真，看住佢A晒D工夫比其他人而佢又沒咩做仲成日唔見左人唔知去左邊又唔係開會就覺得很不齒！ 十月十一月：有點輕狂，要節制一下。就好似明知東坡肉五花腩且扣肉食完後會令膽固醇上升，對身體唔好，但佢又實在好好味抵受唔到又要食咁，真係唔太健康。 十一月：公司有炒人謠言。其實我就唔驚ge，因為我單project都未完，而且我又唔係做唔到野的人，不過見到有同事走都唔係好開心，因為有D真係係做到野，只不過係剛剛唔好彩單project做完先至被炒。又令我感到個市係唔係唔係想像中好呢？「轉工會唔會risky左？」在我腦中盤旋著...... 十一十二月：哈！三佬成了我們組的眾人公敵，無論則師draftman秘書定大佬都唔老禮佢。個個都吼住佢幾時唔係公司但又唔係site，即係不知所蹤的情況，大佬又對佢打打單單，語氣極唔友善。其實都唔明，大佬都知佢幾唔掂ge啦！點解仲留佢係度對我地陀手lung腳呢？其實佢吞pop我至多唔抵得點解有人唔做野有人工收，但係佢郁到我的人，拿我的人來用搞到我D圖又沒得出就真係好嬲囉！都唔知佢廿幾年黎點做野ga！ 自九月：對而家的project的厭惡度開始與日俱增，睇怕臨界點離此刻不太遠.... 總結：今年係發生了很多事的一年，有榮燿，有淚水，五味都償遍了，面上的細紋都增添了.....唉..... 2010年期望：轉到工／project&加到人工。考唔考AP就諗諗先。最緊要就係搵到個地主肯認投我呢幅賣極都賣唔出的地皮～呵呵～ | 